मास मिडिया संवादाता (काठमाडौँ)– ऊर्जा, जलस्रोत तथा सिँचाइ मन्त्री कुलमान घिसिङले उज्यालो नेपाल पार्टीको घोषणासभामा सम्बोधन गर्दै भ्रष्टाचार अन्त्य भए मात्र देशले वास्तविक समृद्धिको मार्ग समात्ने बताएका छन्। उनले सुशासनलाई समृद्ध राष्ट्रको मूल आधार बताउँदै नेपालमा विकासका धेरै सम्भावना रहे पनि भ्रष्टाचार र कमजोर प्रशासनिक प्रणालीले ती सम्भावनालाई रोकिरहेको टिप्पणी गरे। उनका अनुसार, जेनजी आन्दोलनले उठाएको भ्रष्टाचारमुक्त देश निर्माणको माग जनताको पीडा र दीर्घकालीन निरासाबाट जन्मिएको आवाज हो, र यसको समाधान सुशासन तथा पारदर्शिताबाट मात्र सम्भव छ।
मन्त्री घिसिङले सही पात्र सक्रिय राजनीतिमा आउनुपर्ने आवश्यकतामाथि जोड दिँदै अब नेतृत्व चयन गर्दा मतदाताले जिम्मेवार, जनमुखी र परिवर्तनसक्षम व्यक्तित्व पहिचान गर्नुपर्ने बताए। उनका अनुसार, विगतका गल्ती, भ्रष्ट प्रवृत्ति र अकर्मण्यताका कारण जनता निराश हुँदै आएका थिए र यही निराशा जेनजी आन्दोलनका रूपमा विस्फोट भएको हो। उनले राजनीतिमा जनविश्वास पुनःस्थापना नगरेसम्म कुनै पनि परिवर्तन टिकाउ नहुने उल्लेख गर्दै वर्तमान सरकारले आन्दोलनपछिको परिवर्तनलाई संस्थागत गर्न ठोस कदम चालिरहेको जानकारी दिए।
कार्यक्रममा उनले आसन्न निर्वाचनलाई जेनजी आन्दोलनले उत्पन्न गरेको परिवर्तनलाई स्थायित्व र दिशा दिने अवसरका रूपमा वर्णन गरे। अब मुलुकलाई अगाडि बढाउने जिम्मेवारी नयाँ सोच, वैकल्पिक दृष्टिकोण र जनताको अपेक्षा बोक्न सक्ने राजनीतिक शक्ति तथा नेतृत्वले लिनुपर्ने समय आएको मन्त्री घिसिङको भनाइ थियो। उनका अनुसार, जनभावना एकताबद्ध भए मात्र विकल्प खोज्दै अघि बढ्ने प्रयासले परिणाम दिन सक्छ, र सबै वैकल्पिक शक्ति एकजुट भएर परिवर्तनलाई व्यवहारिक रूप दिन तयार हुनुपर्ने आवश्यकता अहिलेभन्दा महत्वपूर्ण कहिल्यै बनेको छैन।
