मास मिडिया संवादाता (काठमाडौँ)– नेपालले आज साफ यू–२० महिला च्याम्पियनसिप अन्तर्गत आफ्नो पहिलो खेल भुटानविरुद्ध खेल्दैछ। खेल नेपाली समयअनुसार बेलुकी ६ः४५ बजे हुनेछ। नेपाली टोली २०२३ को संस्करणमा उपविजेता बनेको अनुभवसहित मैदानमा उत्रन लागेको हो। त्यस वर्ष नेपालले उत्कृष्ट प्रदर्शन गर्दै उपाधिनजिक पुगेको थियो, जसको आत्मविश्वास बोकेर टोली यसपटकको यात्रामा अगाडि बढ्न चाहन्छ।
यो संस्करणको प्रतियोगिता बंगलादेशमा भइरहेको छ, जहाँ नेपाली टिमले घाँसे मैदानमा प्रतिस्पर्धा गर्नेछ। प्रशिक्षक यम गुरुङका अनुसार यो टोलीका लागि एक सकारात्मक पक्ष हो, किनभने अघिल्लो संस्करणमा नेपालले आर्टिफिसियल ट्रफमा खेल्नु परेको थियो, जुन खेलाडीहरूका लागि केही कठिन भएको थियो। गुरुङले प्रि-म्याच प्रेस कन्फ्रेन्समा बताएअनुसार, घाँसे मैदानले खेलाडीलाई सन्तुलनमा रहन सहयोग गर्नेछ र उनीहरूको स्वाभाविक खेल प्रस्तुत गर्न सजिलो हुनेछ।
भुटानविरुद्धको खेल नेपालका लागि सुखद सुरुवातको अवसर हो। अघिल्लो संस्करणमा नेपालले लिग चरणको खेलमा भुटानलाई ४–० ले पराजित गरेको थियो। त्यही अनुभव दोहोर्याउने लक्ष्यका साथ नेपाल मैदान उत्रन लागेको छ। भुटानले २०२३ मा खेलेका तीनै खेलमा पराजय भोगेको थियो, जसले नेपाललाई मनोवैज्ञानिक लाभ दिन सक्छ।
यसपटकको प्रतियोगितामा भारत सहभागी छैन भने श्रीलंका पहिलोपटक यू–२० प्रतियोगितामा सहभागी भएको छ। डबल राउन्ड रोबिन फर्म्याटमा चार टिम—नेपाल, बंगलादेश, भुटान र श्रीलंका—बीच प्रतिस्पर्धा हुनेछ। नेपालले दोस्रो खेल जुलाई १३ मा बंगलादेशविरुद्ध र त्यसपछि जुलाई १५ र १७ मा श्रीलंकाविरुद्ध दुई खेल खेल्नेछ। जुलाई १९ मा भुटानसँग दोस्रोपटक र अन्तिम खेल जुलाई २१ मा बंगलादेशसँग हुनेछ।
नेपाली टोली बिर्सना चौधरीको कप्तानीमा बंगलादेश पुगेको छ। टोलीमा लीला जोशी, करुणा बुढाथोकी, झुमा विश्वकर्मा, कविता गुरुङ, मीना देउवा, समीक्षा मगरसहित २३ खेलाडी छन्। धेरैजसो खेलाडीले अघिल्लो संस्करणमा समेत प्रतिनिधित्व गरिसकेका छन्, जसले टोलीको एकता र अनुभवमा बल पुर्याएको छ। प्रतियोगिताको अन्त्यमा सर्वाधिक अंक ल्याउने टोलीले उपाधि जित्नेछ, त्यसैले हरेक खेल नेपालका लागि निर्णायक हुनेछ।
