MMI संवादाता- बुढानीलकण्ठ नगरपालिका–१०, पारिजात टोल कपनमा ज्येष्ठ नागरिक समाजद्वारा आयोजना गरिएको वृहत् देउसी भैलो कार्यक्रम भव्य रूपमा सम्पन्न भएको छ। कार्यक्रममा दर्जनौँ वृद्धवृद्धाको उत्साहजनक सहभागिता रहेको थियो। हाँसो, गीत, भजन र नाचले भरिएको उक्त कार्यक्रममा उमेरले भन्दा पनि मनले जवान ज्येष्ठ नागरिकहरू एकै ठाउँमा भेला भई आनन्द मनाएका थिए। देउसी भैलोको स्वरले टोलभरि आत्मीयता र खुशीको वातावरण छाएको थियो।
यो समाज ज्येष्ठ नागरिकहरूको मन बिसाउने चौतारीको रूपमा स्थापित हुँदै आएको छ। सहभागीहरूले यसलाई केवल भेटघाटको थलो मात्र नभई आत्मीयता, माया र पारस्परिकता आदानप्रदानको माध्यमका रूपमा व्याख्या गरेका थिए। उनीहरूले भने, “यहाँ हामी आफ्ना पुराना दिन सम्झन्छौं, नयाँ साथी बनाउँछौं, र जीवन फेरि रमाइलो लाग्छ।” समाजले वृद्धवृद्धाको सामाजिक सहभागिता र आत्मसम्मान बढाउने कार्यमा महत्वपूर्ण भूमिका खेलेको छ।
कार्यक्रमको नेतृत्व बुढानीलकण्ठ नगरपालिकाका ज्येष्ठ नागरिक समाजका अध्यक्ष उद्यव प्रसाद दाहालले गर्नुभएको थियो। उहाँको सक्रियता र समर्पणले सबै सहभागीलाई उत्साहित बनाएको थियो। दाहालले बुबा–आमाको सेवा र सम्मान गर्नु नै साँचो भक्तिको रूप भएको बताउनुभयो। उहाँका भनाइले उपस्थित सबैमा सकारात्मक ऊर्जा र जिम्मेवारीको भावना जगाएको थियो।
साँस्कृतिक कार्यक्रमको क्रममा युवा उद्यमी खडक बोगटीले नेपाली गाँजा र अल्लोबाट बनेका कपडाको प्रयोगलाई प्रवर्द्धन गर्नुपर्ने धारणा राख्नुभयो। उहाँका विचारले स्वदेशी उत्पादनप्रतिको गर्व र आत्मनिर्भर अर्थतन्त्रप्रतिको चेतना जगाएको थियो। सहभागीहरूले उहाँको प्रस्तुतिलाई देशप्रेम र उद्यमशीलताको प्रेरणाको रुपमा लिएका थिए ।
कार्यक्रमको मिडिया कभरेज युनिभर्सल टेलिभिजनले गरेको थियो। करिब २० जना वृद्ध बुबा–आमाका शुभकामना र अनुभवहरू टेलिभिजनमा रेकर्ड र प्रसारण गरिएको थियो। धेरैका लागि यो पहिलो मिडिया अनुभव बनेको थियो, जसले उहाँहरूको अनुहारमा खुशी र आत्मसन्तुष्टि भित्र्यायो। देउसी भैलोको स्वर, स्नेह र सम्मानले भरिएको यो कार्यक्रमले समाजमा संस्कृतिप्रतिको माया र आत्मीयता झनै गाढा बनाएको छ।
